|
玩具 戚其義
戚其義七六年加入無綫，最初擔任場務，後來成為當年「金牌監製」甘國亮的統籌，是名副其實的「紅褲子」出身。
多年來，戚其義監製過不少膾炙人口的作品，由<創世紀>﹑<妙手仁心三>到<金枝慾孽>及新劇<火舞黃沙>，然而當今「金牌監製」的事業，郤不是別人那般一帆風順。
九二年他曾離開無綫，拍過三套電影，其中曾與杜其峰合作拍<沙灘仔與周師奶>，可惜成績平平。
經歷過低潮，戚其義更珍惜現時所有。他是眾所周知的工作狂︰「身為製作人，一定緊張收視。你話我係「金牌監製」啫，其實咪一樣係咁做…如果今次唔得，下次就冇新「玩具」玩，我真係會擔心架！」
梗係啦！戚監製，你件玩具價值過千萬。
近期，最多人問我既問題係︰「監製，你對<火舞黃沙>有咩期望﹖」
我一定話，我有理想，但無期望。
理想可以諗到天花龍鳳，但觀眾反應就永遠不能期望。正如我冇估計過<金枝慾孽>會咁爆;但<血戰軒轅>的收視又會同我理想中有一段距離。
這麼多年，若我說沒有「收視方程式」，講都冇人信。基本上，只要劇集加多點觀眾少機會接觸的元素 - 色情暴力，要好收視一點也不難，有人的確會咁做。但TVB係大台，要顧及多數觀眾的喜好，所以不能太踩界。
較多火爆鏡頭的<O記實錄>已經算是我多年來最踩界之作。
而且有許多事會出乎意料。好似<妙手仁心三>，黎姿飾演的解剖師就被人投訴。其實根本唔關個角色事，觀眾投訴黎姿解剖時，那個屍體冇著衫，好「色情」。
可能有人會認為好似這樣的投訴很無聊，但政府電檢處不會這樣想，一接到投訴就會非常重視。
所以，很難在限制之下去估計觀眾的要求和口味，與其期望太多，不如學習去愛上你的工作，享受工作過程。
鍾意玩
若非記者提我，都忘記自己原來入行已經三十年，我從未做過其他行業，一入行就知這是我的終身職業。點解呢，因為我好貪玩。做場記時已經諗︰有邊行可以三更半夜都有人陪你玩﹖朝九晚五絕對唔啱我。
做電視製作，工作時間長，日日做十幾個鐘，生活同工作已經分唔開。如果不喜愛，會好難捱。所以我會挑自己喜歡的題材，就可以將工作當作成新玩具。
拍攝時我好認真，同我合作過的演員都被我鬧過。因為我知道如果這玩具玩壞左，下次就再冇機會玩。拍完劇，點玩都得，但工作時每分每秒都係錢，一定要認真。
工作緊張，所以珍惜每個可以玩的機會，好似等別人唔為意，搬開張椅子，好等他一坐落去就跌親 - 這種當然用來「招呼」玩得的同事。
玩得人多，自然會俾人玩。在大陸拍<火舞黃沙>時，住我隔雤籬房的蔡少芬成日玩門鐘，按完門鐘就匿埋，等你開門唔見人就以為有鬼。最初唔知，個心真係怯怯哋。點知有日起身，一出房清潔阿嬸就同我講︰蔡小姐昨晚按完你房鐘，一跑到轉角位就仆到成個人瘀晒。
我終於知道係蔡少芬。但我見到她時仲扮到好驚，等她以為好叻，沾沾自喜。其實後來個個都知係她搞鬼，可能她自己到今日仍蒙在鼓裏。
當年因為工作與邵美琪分手，但無損兩人合作。戚其義︰「我覺得佢好有毅力同好專業。」
工作狂
別人常叫我「金牌監製」，其實不過是虛名，咪一樣係咁做。呢兩年，我同好多同事一樣，都冇加過人工。
得到觀眾認同當然開心，但有時都好煩。正如早前有報道話我與<金枝慾孽>演員到湖南宣傳，在錄影節目中，當眾指黎姿為最不喜歡的演員及「白癡」，黎姿仲因而感到不悅。
雖然我和黎姿都明白根本是斷章取義，「白癡」不過是說「玉瑩」的角色性格。但我最不忿的，如果他們真的(記者)誤會了，不緊要，但至少都要打個電話問我的回應。
又話我同女藝員約會，搞到好多人成日以為做監製好過癮，好似使做咁，又可以艷福無邊，大把靚女主動約會你。其實邊有咁多時間。
我係一個工作狂，見周旭明(<火舞黃沙>編審)仲多過見我老竇。我愛工作多於一切，又冇家庭觀念，如果要成為我女朋友，一定要非常懂得體諒。所以咪周時換畫…被人飛囉！
平日冇時間，寧願將感情生活投射在作品中。搞吓劇中主角的三角﹑四角戀，不知幾好玩，感覺好刺激。套劇拍完就抽離，下次又再重新來過。近期又要開始「度」八十集新劇，又有得搞。劇中感情生都已經令我「應接不暇」。
現實生活﹖咪搞我！(戚其義)
訪問完！
| 
[复制链接]
IP卡
狗仔卡
发表于 2006-5-8 18:42:20
提升卡
置顶卡
沉默卡
喧嚣卡
变色卡
显身卡
发表于 2006-5-10 00:16:10
发表于 2006-5-10 00:41:02
楼主
~!個訪問都做得幾好
!係呢唔知TVB幾時訪問朗月呢?期待中........